Saya Ok La Bik Chinhrauitu Hna Keneh Dawh Neh Chin Tawngtan Pya Ca Uk Um Nah Asai Uh

Janaury23, 2020; Matupi, Cangbong vang, Keshema Baptist Church kungsut tih Ca­tael saya pa Ok La Bik loh Laimi ca ah keneth dawh ca uk neh, ChinTaungtan pya ca-uk la akong dong ah um nah asai. Tekah atue atang tah hlaem ben (2:00) PM lam ka loh atue atong uh. Umnah taemkung la Rev. San Thaih loh ahut nah. Atue nawnkung la Rev. Keneth Hen­ry kah thang thui naneh atong uh. Catael saya Okla Bik ham olpuei hlacam kung la Rev. Dr. Victor Lai Lian kah thang thui na neh yoe then apaek. Ol thang then thuikung la Rev. Lung Noe loh Pathen ol neh tha paek ol athui. Bawt nala Rev. Pa Bawng kah thang thui na neh abawt sak uh. Hlangmi (75) thum uh.

Um nah program dong ah lamhma cuek la Pa Thang Kol (Balendy pa) loh koeh nah ol athui tah” Chin ram khui ah Ok La Bik kah cathut bang lam he ulong khaw thut mah pawh. Badong ah tikoi nih Matupi peng Chin ram khui kah mingthang Tlangming, Tui­va ming, political, rhorhai kawng neh Sokah yaeti loeh lang nakawng khaw asoep la athut thai dong ah tila athui. Apoek kangaih koektah Tangrha (10) kaawng hlan khui phanat kanat mah pawh tikah ko poek ka hmuh vaeng ah kopoek neh bi abitite kahmuh vaeng ah Matu rhoengthai rhoek loh awt ham koi ol moeh athui.”Kut doe la Baisi angki neh akhuk.

Tephoei atah Umnah poei kah atue vaeng ah Khohla vangsang lamkah omngaih ol la hlang (12) loh ham pat pa uh. Tevaeng ah Hlang panga (5) kah bueng atae thai. (1) Dr. Chit San Win kah hinyah paek um nah Ca. (2) Saya Kyi Hawt Chum (Hakha) kah hinyah paek um nah Ca . (3) Saya kyi Van Kyi (Falam) kah hinyah paek um nah ca. (4) Rev. Lai Cung (CACC) kah hinyah paek um nah Ca. Rev. Joel Ling (LBC, Yangon) kah hinyah paek um nah Ca. Matupi peng Ngalaeng koca rhoek neh MBA secretary lam kaloh hinyah paek um nah Rho Ca apaek uh.

Rev. Lung Noe (MBA, Secretary) kah thapaek nah ol tah Kholaeh kawng athui. Lamhma cuek la Dr. Than Sein, Ukpadi shok kah ol thui neh athui nuet tih athui. Athui ol tah ” Tahae kah Ukpadi shok kadang he Pathen rhang nen ni. Bi katong hlan ah Pathen mah taeng Rev. Tin Maung Aye kah thang thui neh ka tong ati.”

Pathen kah hlang tueih rhoek ham athui tah ” Ahmantang ah kanthui uh. Kolram loeih sak kung Aung San Thu Riyah Bo Thaih Coeng loh ana loeih sak. Anih kho laeh tah tihnin hil ah n’hmuh thai. Ca-uk ukkhat khaw aboeih hil na tae u mah nim. Matuca ko boeih ng’rhawk u coeng. Crusade ham imkhui ham akhue utih yalh khat ah tangka ting (10) aboe­ih sak uh. Matu hlangnoe rhoek loh Longpuei then a kapaethai koi n’tlap tue apha coeng ” tila athui.

Catael kung Ok La Bik loh athui tah” Tihnin ah akalo rhoek boeih kai akalung nah hui ko la na om uh. Lungpael kung long Bap­tist peng EC rhoek buh kok na la pahoi ka hno nah tila a thui. Kai tah cangkoi, hmuh koi neh yakkoi boeih he kai kah long puei nueh kung ni tila a thui.” A napa kah ol uen tah ” Kaca na­saeh hlang kah mik hip khaw yak ming. Hlang­kah mikdai khaw hanyak ming tikah ol uen neh ta hae hil ah kho kasak ti kah Nupa kah ol rho te khaw pahoi athui caih. “Te phoei tahae ah 2020 hlan kah Chin ram khui kah history he katael li tila athui.